Квириа

Квириа (ақырҭ. კვირია) — ақырҭуа мифологиа анцәахәы, Гмерти иԥа, Гатишвили иԥхьагылаҩ. Аиашара анцәахәы, ауааи Гмертии рыбжьара абжьаҟаза. Уи иаҳаҭыр аҟынтә Квирицховлобеи Халарџьоби аныҳәарақәа еиуеиԥшым ахәмаррақәа иацны иҟарҵон, ԥсаҭатәла имҩаԥыргон. Аԥхынра раԥхьатәи аныҳәагьы иара изкын, 8 еиуеиԥшым аныҳәаратә ҵасқәа (ритуалқәа) иаҵанакуан. Ари аныҳәа аан, аԥшьаҭыԥ аҵлақәа рыла идырԥшӡон, ақыҭақәа рыбжьара аицлабрақәа мҩаԥысуан асы иалхыз аҟлан азааигәара, ашәаҳәара иаҿын, анцәахәы амшцәгьақәа рҟынтә иахьеиқәирхаз азы ҭабуп ҳәа иаҳәо ақәгыларақәа мҩаԥысуан. Иара убас аарҩара аныҟаз, мамзаргьы афырҭын ааигәахо ианалагалакгьы иныҳәон. Иара икульт амаскатә театр Берикаоба аҿиара ашьаҭақәа иреиуан. Лактәи амифологиаҿы анцәахәы Квириа ихьӡ еиқәырханы иҟоуп - Квара ҳәа. Иҟалап уи иреиҳау анцәахәқәа иреиуазҭгьы. Квара иазкны ашәиԥхьыӡ уажәгьы идыруп: «Ина иала лавсун Квара ласивуи! ҳәа, Квириеи Квареи ахьӡқәа урарттәи “квера” - "ҵаҟатәи дунеи", "ажәҩан" аҟны апаралельқәа амоуп.