Кәыҵниа, Леуарса Бида-иԥа

Леуарса Бида-иԥа Кәыҵниа (аур. Леуарса Бидович Квициния; ԥхынҷкәынмза 31, 1912 ш., Аҭара ақыҭа, Кәыдрытәи аучастка, Аҟәатәи аокруг — рашәарамза, 1941 ш., Белосток , Белоруссиатәи ССР) — Аԥсуа поет.

Абиографиа

Диит 1912 шықәса ԥхынҷкәынмза 31 азы Аҭара ақыҭа Кәыдрытәи аучастка (иахьатәи Очамчыра араион). Дҭахеит 1941 шықәса рашәарамза мзмзы, Белоруссиа, Белосток (уажәы Польша иалоу қалақьуп), аҩбатәи адунеитә еибашьраан.

Аҭаратәи ашкол даналга, 1925 шықәсазы Л. Кәыҵниа дҭалоит Н. Лакоба ихьӡ зху Ақәатәи аԥсуа бжьаратә школ-интернат, абраҟа иҵара аныхирқәша /1931/, ԥыҭраамҭак Нхыҵ Кавказтәи арҵаҩратә институт дҭан. уантәи дханҳәны Аԥсныҟа даауеит, аус иуеит Аԥснытәи ашәҟәҭыжьырҭаҟны, аредакциа «Аԥсны ҟаԥшь» аҿы; нас, 1933 шықәсазы, дцоит Москваҟа, даанахәоит Москватәи арҵаҩратә институт. Аҩбатәи акурс аҟны дыштәаз, иааныжьны, 1935 шықәсазы Л. Кәыҵниа дҭалоит А. М. Горки ихьӡ зху Алитературатә институт. Далгоит 1937 шықәсазы.

1938-1939 шықәсқәа рзы Л. Кәыҵниа напхгара азиуеит Аԥснытәи Ашәҟәыҩҩцәа Реидгыла.

1939 шықәсазы арратә маҵурахьы иԥхьоит.

Акьыԥхь аҿы дцырҵит 1928 шықәса инаркны.

Абиблиографиа

Атәыла ҿиоит. Аколективтә еизга. Аҟәа, 1928 шықәса.
Шьаризан. Апоема. Аҟәа, 1933 шықәса.
Аамҭа бзиа. Ажәеинраалақәа. Аҟәа, 1934 шықәса.
Даур. Апоема. Аҟәа, 1936 шықәса.
Иҩмҭақәа; хаз томкны. Аҟәа, 1955 шықәса.

Алитература

Аԥсны аҭҵаарадыррақәа ракадемиа Д. И. Гәлиа ихьӡ зху Аԥсуаҭҵааратә институт, «Аԥсуа поезиа антологиа XX ашәышықәса», Аҟәа-Москва, 2009, ад. 905-906

Азхьарԥшқәа

Квициниа Леуарса Бидович (аур.)
Кәыҵниа Леуарса Бида-иԥа (аԥс.)