Авикипедиа

Герзмаа, Хьыбла Леуарса-иԥҳа

Хьыбла Леуарса-иԥҳа Герзмаа (дииҭ ажьырныҳәамза 6, 1970 ш., Пицунда) — абжьы ссир зхоу, К.С. Станиславскии Вл.И. Немирович-Данченкои рыхьӡ зху амузыкатә театр дасолисткоуп. Дықәгылахьеит лара Мариинсктәи атеатри, Париж Елисеисктәи адәқәа ртеатри Диу Шатле атеатри, Флоренциа Комунале атеатри, Барселона Дель Лисеу атеатри уҳәа акыр рсценақәа рҿы. Хьыбла Герзмааԥҳа – Франсиско Виниас ихьӡ зху Жәларбжьаратәи авокалистцәа рконкурс II апремиа далауреатуп, иланашьоуп П.И. Чаиковски ихьӡ зху X Жәларбжьаратәи аконкурс аҿы Гран-при, «Золотой орфей - 2001», аноминациа «Зегьы иреиӷьу ашәаҳәаҩ» (2006) атеатртә премиа далауреатуп. Хьыбла Леуарса-иԥҳа Герзмааԥҳа 2006 шықәса рзы Урыстәылатәи Афедерациа зҽаԥсазҭәыз артистка ҳәа ахьӡ лыхҵан, 2012 шықәса рзы – Урыстәылатәи Афедерациа жәлар рартистка ҳәа. 2012ш. рзы Хь.Л. Герзмааԥҳа илыхҵан Аԥсны жәлар рартистка ҳәа ахьӡ.

Герзмаа, Хьыбла Леуарса-иԥҳа
Ахатәы хьӡы Хьыбла Леуарса-иԥҳа Гьырзмаа
Аира ажьырныҳәамза 6, 1970 ш. (54 ш.)
Пицунда
Атәылауаҩра Асовет Еидгыла,
Урыстәыла,
Аԥсны Аҳәынҭқарра
Алма-матер Аҟәатәи амузыкатә ҵараиурҭа П.И.Чаиковски ихьӡ зху Москватәи аконсерваториа
Азанааҭ Аоператә шәаҳәаҩы
Анашьамҭақәа Аԥсны жәлар рартист (2008), Урыстәылатәи афедерациа жәлар рартист (2012), Урыстәылатәи афедерациа Аҳәынҭқарратә премиа алауреат(2021).
Абызшәақәа Аԥсуа бызшәа,
Аурыс бызшәа,
Англыз бызшәа
Асаит http://www.hibla.ru

Абиографиа аредакциазура

Хьыбла Гьерзмаа-ԥҳа диит  1970 шықәса жьырныҳәа 6 рзы акурорттә қалақь Ԥицунда анемец бызшәа аҟнытә аиҭагаҩ – «Интурист» агиди апонсионат «Ԥицунда» администратор еиҳаби  рҭаацәараҿы. Хьыбла даныхәыҷыз лаб Леуарса Гьерзмаа Германиантәи апианино аахәаны илзааигеит. Уи даныхәыҷӡаз инаркны ашәа лҳәон, ароиаль аҿы дыхәмаруан. Хьыбла лхәыҷра шықәсқәа зегьы мҩаԥысит аорӷантә музыка зыҩныҩуаз Ԥицундатәи аныхабаа азааигәара. Дшыхәыҷыз илнырит асцена агәаҳәара. Уи раԥхьаӡа акәны анырра ду лызҭаз иреиуоуп Аԥснытәи аҳәынҭқарратә  ашәаҳәареи акәашареи рансамбль , иара убас аскрипкарҳәаҩы Лиана Исакаӡе  Ԥицундатәи аорӷантә зал аҿы лықәгылара.

.Хьыбла Гьерзмааԥҳа  дышқәыԥшӡаз лани лаби  лыԥхеит. Уи акыр ирнырит лдунеихәаԥшышьагьы, лзанааҭ алхрагьы. Раԥхьа аҵара лҵон Гагратәи амузыкатә школ аҿы. Афортепиано акласс ала далгеит Аҟәатәи амузыкатә ҵараиурҭа. Данқәыԥшӡаз дазыгәышьуан аорӷанарҳәаҩны аҟалара. Аҟәатәи амузыкатә ҵараиурҭаҿы рҵаҩцәас илыман Карлен Иавриани  Жозефина Бумбуриди.  

1989 шықәсахы Хь.Гьерзмааԥҳа дҭалеит П.И.Чаиковски ихьӡ зху  Москватәи аконсерваториа (авокалтә ҟәша), далгеит – 1994 шықәсазы. Рҵаҩцәас илыман апрофессорцәа И.И.Масленниковеи, Е.М.Арефиевеи. 1996 шықәсазы – Москватәи аконсерваториаҿы иҟоу ассистентура-астажировка дахысит  аҟаза Ирина Масленникова лҿы.  Хь.Гьерзмааԥҳа факультатив ҳасабала, хышықәса лҽазыҟалҵон аорӷан акласс аҿы.  Хьыбла Гьерзмааԥҳа  раԥхьаӡа акәны аҳәаанырцә азҿлымҳара ҷыда лырҭеит 1993 шықәсазы,   Буссето  имҩаԥысуаз аконкурс  «Вердиевтәи абжьқәа» аҿы. Уаҟа ахԥатәи апремиа ланашьан.  Шықәсык уи ашьҭахь Н.А. Римски-Корсаков ихьӡ зху Санкт-Петербургтәии  Виниас ихьӡ зху Испаниатәи аконкурсқәа рҿы аҩбатәи аҭыԥқәа аанылкылеит. Ақәҿиара ду лоуит ашәаҳәаҩ қәыԥш  1994 шықәсазы. П.И.Чаиковски ихьӡ зху Москватәи Х-тәи Жәларбжьаратәи аконкурс аҿы, уаҟа уи илаҭәашьан Гран-при.

1995 шықәса инаркны Хьыбла Гьерзмааԥҳа — К.С.Станиславскии Вл.И.Немирович-Данченкои рыхьӡ зху Москватәи амузыкатә театр аҿы солистс дыҟоуп.

1999 шықәсазы  диит  Хьыбла Гьерзмааԥҳа лыҷкәын заҵәы Сандро. Амузыка адырҩцәа ишазгәарҭо ала, уи нахыс ашәаҳәаҩ лыбжьы еиҳагьы иссирхеит, еиҭаҳәашьа амамкәа иҭҭәааит, ихаахеит,  лирикала ибеиахеит, иҟәымшәышәхеит, амҽхак еиҳагьы иҭбаахеит.  

2001 шықәсазы Хь.Гьерзмааԥҳа Аԥсны еиҿылкааит есышықәсатәи амузыкатә фестиваль «Хьыбла Гьерзмааԥҳа иаалыԥхьоит…» Ԥицунда зхы аркыз ари афестиваль иахьа уажәраанӡа есышықәса аҳәаақәа арҭбаауеит.  Имҩаԥысуеит Аԥсны адагьы аҳәаанырцә. 2014 шықәсазы раԥхьаӡа имҩаԥган Москва. 2019 ш. азы ари амузыкатә фестиваль мҩаԥган Аҟәа астадион «Динамо» аҿы.  

  2008 шықәсазы Хь.Гьерзмааԥҳа Большой театр ашҟа ааԥхьара лырҭеит, аха гастроль ҳасабла  адунеитә театрқәа рышҟа лассы-лассы дахьықәгылоз иахҟьаны мап ацәылкит.

1014 шықәса жәабран 23 рзы Хь.Гьерзмааԥҳа далахәын Шәача имҩаԥысуаз аӡынтәи Олимпиатәи ахәмаррақәа раркра иазкыз ацеремониа: уи «Ааԥын гәырӷьаҿҳәаша» зыхьӡны аҳауатә океан ихыз аӷба  аҟнытә иналыгӡон ашәа - Олимпиатәи авальс.

Хь.Гьерзмааԥҳа изныкымкәа дықәгылахьеит  Кремльтәи Ахан имҩаԥысуа аконцертқәа рҿы аофициалтә делегациақәеи асасцәа дахьқәеи рҿаԥхьа.

1015 шықәса жьырныҳәа 20 рзы Ниу-Иорктәи атеатр «Метрополитен-опера» аҿы имҩаԥысит «Авокалтә циклқәеи аурыс композиторцәа рромансқәеи», «Хьыбла Гьерзмаа, асапрано» зыхьӡыз акомпакт-дискқәеи,  иара убасгьы ашәаҳәаҩ лыбжьы зынҵаз авинилтә пластинкеи рӡыргара. Уи анаҩсан Хьыбла Гьерзмааԥҳа еиҿылкааит автограф-сессиа. «Метрополитен-операҿы» раԥхьаӡа акәны имҩаԥган Урыстәылатәи артист изкны  ас еиԥш иҟаз аус.  

2015 шықәсазы - жәабран 22 инаркны лаҵара 24 рҟынӡа Хьыбла Гьерзмаа ателеканал Россия-1 аҿы ашоу «Один в один» ахԥатәи асезон ажиури далахәын. 2021 шықәсазы  Актәи аканал аҿы ашоу «Точь в точь» ажиури далахәылан.  

2016 шықәсазы ашәаҳәаҩ Германиа имҩаԥылгеит агәыҳалалратә концертқәа, атеррортә актқәа ирылаӡыз ауаа ргәалашәара ахьӡала.

2021 шықәса цәыббра мза инаркны «Онегин» зыхьӡу амилаҭтә оператә премиа Апрезидент  иҭыԥ аанылкылоит.

Арҿиара аредакциазура

К.С.Станиславскии Вл.И.Немирович-Данченкои рыхьӡ зху Москватәи амузыкатә театр ақәыргыламҭақәа рҿы ихадоу апартиақәа налыгӡоит.  Урҭ рҟнытә:

  • Лиудмила    (Глинка «Руслани  Лиудмилеи» )
  • Аҳкәажә-Амшынҟыз  (Римски-Корсаков  «Аҳ Салҭан изку алакә» )
  • Шемахантәи аҳкәажә  (Римски-Корсаков  «Ахьтәы рбаӷьҷышь»)
  • Луиза   ( Прокофиев («Аберҭыԥ аҿы аҳәара»)
  • Розина  (Россини  «Севильтәи аԥаҵасаҩы»)
  • Адина    (Доницетти («Абзиабаратә рыжәтә»)
  • Виолетта Валери  (Верди («Травиата» )
  • Мимии  Миузеттеи  (Пуччини  «Богема» )
  • Татиана   (Чаиковски  «Евгени Онегин»,)
  • Анимфа   ( М. да Галиано «Дафна» )
  • Адель       (И. Штраус «Ахәылԥҵыс» )
  • Лиучиа      (Доницетти  «Лючиа ди Ламмермур» )
  • Донна Анна  (Моцарт «Дон Жуан»)
  • Олимпиа, Антониа, Џьульетта (Оффенбах «Сказки Гофмана», )
  • Вителлиа  (Моцарт «Тит игәшаҭара» )
  • Лиу ( Пуччини  «Турандот»)
  • Амелиа Гримальди  (Верди «Симон Бокканегра», )
  • Медеиа ( Керубини  «Медеиа»,)
  • Леонора   (Верди «Аразҟы амч»)
  • Дездемона  (Верди «Отелло»)
  • Леонора  (Верди «Трубадур»)
  • Анна Болеин  (Доницетти «Анна Болеин»)

Хь.Гьерзмааԥҳа лырҿиаратә кариеразы изныкымкәа дықәгылахьеит Санкт-Петербург Мариинтәи атеатр, Флоренциа Коммунале атеатр, Ниу-Иорк Метрополитен Опера, Лондон «Ковент-Гарден», Венатәи аҳәынҭқарратә опера, Барсенола Гранд Театро де Лисео, Болгариа Софиатәи Амилаҭтә опера, Париж Елисеитәи адәқәа ртеатр, Валенсиа Аҳкәажә Софиа Палау де лез Арт уҳәа егьырҭ адунеи аҿы еицырдыруа асценақәа рҿы. К.С.Станиславскии В.И.Немирович-Данченкои рыхьӡ зху Амузыкатә театр дацны Хь.Гьерзмааԥҳа гастроль ҳасабла дыҟан Аладатәи Кореиеи Еиду Америкатәи аштатқәеи рҿы. Уи дықәгылахьеит Германиа Лиудвигсбургтәи афестиваль аҟны. Аконцерттә программақәа лыманы агастрольқәа мҩаԥылгахьеит Швециа, Франциа, Голландиа, Британиа Ду, Австриа, Бельгиа, Испаниа, Бырзентәыла, Еиду Америкатәи аштатқәа, Иапониа, Ҭырқәтәыла.  

2008 шықәсазы Хь.Гьерзмааԥҳа далахәын IV есышықәсатәи жәларбжьаратә фестиваль «Crescendo»   2008 шықәсазы  Лондон Акралтә оператә театр «Ковент-Гарден» (Royal Opera House) асценаҿы П.Чаиковски иопера «Евгени Онегин» аҿы  уи иналыгӡеит Татиана лпартиа. 2009 шықәсазы иара уаҟа  Џь.Пуччини иопера «Богема» аҿы иналыгӡеит Мими лпартиа. 2010 шықәса рзы Хьибла раԥхьаӡа акәны дықәгылеит Ниу-Иорк  Метрополитен-опера асценаҿы. Араҟа Жак Оффенбах иопера «Гофман илакәқәа» рҿы уи иналыгӡеит акыр иуадаҩу Антониа лпартиа. Уи адунеитә репертуар зегьы аҿы иакзаҵәыку спектакльуп операк аҿы еиуеиԥшым абжьқәа  ԥшьыхкык рыла асапрано ашәа ахьылҳәо. Ҳаамҭазы адунеи аҿы ашәаҳәаҩцәа рахьтә  ҩыџьа заҵәык роуп апартиақәа аԥшьбагьы операк аҿы еицыназыгӡо – Хьыбла Гьерзмааԥҳаи Диана Дамрауи.

Ҭагалан 2011 шықәсазы Пуччини иопера «Богема» аҿы Хь.Гьерзмааԥҳа  иналыгӡеит аԥхын 2011 ш. Римтәи аопераҿы илҳәаз Мими лпартиа. 2011 шықәса жәабран азы Хь.Гьерзмааԥҳа лдебиут мҩаԥысит Токиатәи NHK Hall асценаҿы. Уи Џь.Пуччини иопера «Турандот» аҿы иналыгӡеит Лиу лпартиа (адирижиор Валери Гергиев).

2012 шықәсазы ашәаҳәаҩ  дырҩегьых дцәырҵит Ковен Гарден асцена ашҟа иҿыцу апартиа ала: уи Моцарт иопера «Дон Жуан» аҿы иналыгӡеит Донна Анна лпартиа. Ҭагалан дхынҳәит  Метрополитен-опера асцена ашҟа. Араҟа иналыгӡеит Џь.Пуччини иопера «Турандот» аҟнытә Лиу лпартиа. Уи апартиа ашәаҳәаҩ раԥхьаӡа  иналыгӡеит  2011 шықәсазы Мариинтәи атеатр  гастроль ҳасабла Токиатәи NHK-холле асценаҿы ианықәгылоз. Раԥхьаӡа акәны Хь.Гьерзмааԥҳа Венатәи аҳәынҭқарратә опера асцена ашҟа дцәырҵит  Моцарт иопера «Тит игәшаҭара» аҟнытә Виттелиа лпартиа анагӡарала. Ари – даара зынагӡара уадаҩу, звокалтә диапазон акырӡа иҭбаау, аречитативтә лагалақәа маҷымкәа излоу, акырӡагьы иауу ариақәа рыла ишьақәгылоу  апартиа  Хьыбла Гьерзмаа иара убасгьы  иналыгӡеит Франциа - «Гранд-опера» асценаҿы.

2013 шықәсазы Хь.Гьерзмааԥҳа Лондонтәи Акралтә оператә театр «Ковент Гарден» асцена ашҟа дцәырҵит Џь.Верди иопера «Симон Бокканегра» аҟнытә Амелиа лроль ала. Уи партниорцәас илыман Томас Ҳемԥсони Ферруччо Фурланеттои. Аспектакль мҩаԥсуан атеатр адирижиор хада Антонио Паппано инапхгарала.  2013 шықәса мшаԥымзазы Москватәи аконсерваториа Азал Ду  аҟны имҩаԥысыз лсолатә концерт аҿы Хь.Гьерзмааԥҳа иналыгӡеит П.И.Чаиковски иромансқәа. Аоркестр напхгара азиуан Иури Симонов.

В 2016 шықәсазы Большои театр асценаҿы Хь.Гьерзмааԥҳа раԥхьаӡа акәны иналыгӡеит Џьузеппе Верди иопера «Дон Карлос» аҿы  Елизавета Валуа лпартиа.

Ашәаҳәаҩ акыр шықәса аус ицылуан арежиссиор-ақәыргылаҩ Александр Титель. Уи аус рыцылуеит Владимир Спиваков, Урыстәылатәи Амилаҭтә филармониатә оркестр, «Виртуозы Москвы, Денис Мацуев, Николаи Лугански, А.Рудини оркестр Musica Viva-еи , В.Гьергьиев, В.Федосеев, А.Лазарев, М.Плетниов, В.Синаиски, Иу. Бешмет уҳәа адунеи аҿы еицырдыруа адирижиорцәа, амузыкатә ҟазацәа.

Хь.Гьерзмааԥҳа иҭалҩит имаҷымкәа акомпакт-дискқәа: Ave Maria, «Хьыбла Гьерзмааԥҳа иналыгӡоит аурыс романсқәа», «Хьыбла Гьерзмааԥҳа мрагыларатәи лроманскәа». Иапониатәи аилахәыразы Хь.Гьерзмааԥҳа иҭалҩит аурыс программақәа акык-ҩбак, Н.Миасковскии М.Ипполитова-Ивановеи рромансқәа рцикл. Акамертә музыка аҭаҩрақәа зегьы  Хьыбла Гьерзмааԥҳа илыцҟалҵеит уи аханатә аахыс аккомпаниаторс илымоу, апианинорҳәаҩы Екатерина Ганелина.  2014 шықәса жьҭаара 14  рзы Москватәи жәларбжьаратәи амузыка аҩны Светланов изал аҿы Хьыбла Гьерзмааԥҳа  иҭалҩит  Моцарт, Верди, Россини, Доницетти, Беллини, Рихард Штраус раԥҵамҭақәа ирылхыз аконцерт. Уи ҭаҩын Владимир Спиваков напхгара зиҭоз Урыстәыла Амилаҭтә филармониатә оркестри Хьыбла Гьерзмааԥҳаи(абаритон Арсен Согомониан далархәны)   реицымҩаԥгарала.

Хьыбла Гьерзмааԥҳа лхы рылалырхәуеит аклассикатә спектакльқәа мацара ракәымкәа, ҳаамҭазтәиқәагьы,  аха, лажәақәа рыла,  «зхатәы гьама змоу, насгьы асценаҿы атеатртә хьыԥшра аҳәаа иҭымсуа» аспектакльқәа рҿы. Хьыбла Гьерзмааԥҳа аконцертқәа рҿы қәҿиара дула иналыгӡоит аԥсуа шәақәа. Москвеи Ниу-Иорки уи лспектакльқәа рышҟа инеиуеит аоператә ҟазараҿы зегь реиҳа идыру, илыԥшааху ахәаԥшцәа.

Акритика аредакциазура

Сергеи Коробков  Петербургтәи атеатртә журнал (№ 2 — 2013) аҿы ишазгәеиҭо ала, Хь. Гьерзмааԥҳа лколоратура – «театртә гәыхыҭхыҭроуп, поетикатә рифмоуп, ахаҿсахьа адраматургиатә еизҳараҿы емоциатә «ҵкаруп», уи л-belcanto акәзар, ухызхуа аҟазшьаҷыдареи акәамаҵамақәеи рыла ашәаҳәаҩ иахьазы адунеи зегь аҿы дырҭахны,  дазхарҵо дҟарҵоит.

Анастасиа Архипова (OperaNews.Ru) иазгәалҭоит  Гьерзмааԥҳа лыбжьы иалыҩуа алирикатә цәаҩа, уи иамоу аматанеиратә ҟазшьа, ухы-угәы иалсны уеимыздо аколоратура иамоу аҟармаҵыстә гәыхыҭхыҭра. Уи еснагь лҽазылшәоит лхатәы бжьы иамоу ҵаҟатәи аҳәаақәа реиҵыхра, драматә ԥшшәыла арбеиара.  Пиотр Поспелов «Ведомости» аҿы дазааҭгылоит ухызхуа агәаартыра, ацәанырра иаша, зеиԥшыҟам авокал Оффенбах иопера «Гофман илакәқәа» рҿы  Хьыбла иналыгӡо апартиаҿы.  Ажурнал «Vogue» аҿы Хьыбла  Гьерзмааԥҳа  иҿыцу, «абжьы мацара акәымкәа, ашоу, абриллиантқәа рцырцырра, асценаҿы ахымҩаԥгашьа, аинаалара, актиортә хәмарра уҳәа» реилаӡҩара зылшо  аоператә шәаҳәаҩуп ҳәа дрыԥхьаӡоит. Метрополитен-опера амузыкатә департамент адиректор Крег Рутенберг иаликаауеит Хьыбла Гьерзмааԥҳа лыхшыҩи, лтеатртә ҟазареи, акадифа иаҵәеиԥш азыӡырҩы дызгәыҵазыҳәҳәо уи лыбжьы ссири.

Аџьаз аредакциазура

Аџьаз – Хьыбла Гьерзмааԥҳа аханатә аахыс дызҿыгәҳәаауа бзиа илбо музыкатә хырхарҭоуп. Еиҳарак уи дрызҿлымҳауп кроссовер астиль аҿы аеқспериментқәа – еиуеиԥшым амузыкатә жанрқәеи астильқәеи рсинтез, аклассикеи аџьази реилаӡҩара.  Амузыкатә дунеи аҿы акрызҵазкуа хҭысқәаны иҟалеит Хьыбла Гьерзмааԥҳаи апианинорҳәаҩы Даниил Крамер иџьазтә трио «Опера. Джаз. Блюз»  рконцертқәа. Аконцерттә программа шықәсыбжак ахьтә знык идырҿыцуеит. Аконцертқәа мҩаԥысхьеит Москва, Шәача,  Урыстәыла егьырҭ ақалақьқәа рҿы, иара убас Вена, Лондон, Единбург. Хьыбла Гьерзмааԥҳа  аџьазтә дунеи аҿы зегь реиҳа бзиа илбо апартниорцәа дыруаӡәкуп Георги Гараниан. Абасист Андреи Иванови  адауласҩы Дмитри Севастианови лыцны Хьыбла Гьерзмааԥҳа есышықәса  Ԥицунда аџьазтә фестивальқәа мҩаԥылгоит. Традициала уи афестиваль аҳәаақәа ирҭагӡаны имҩаԥысуеит  «Иҿыцу аԥсуа хьӡқәа» зыхьӡу аконцерт. Иаков Окунь иҟаиҵаз аџьазтә ус адуларала, афестиваль аҿы Хьыбла Гьерзмааԥҳа иналыгӡеит аԥсуа жәлар рашәа «Ахрашәа».

Аимидџь аредакциазура

Урыстәылатәи аоператә сценаҿы Хьыбла Гьерзмааԥҳа  - зегь реиҳа астиль зныԥшуа, агьама змоу, иаамысҭашәоу ашәаҳәаҩцәа дыруаӡәкны дрыԥхьаӡоит. Ашәаҳәаҩ лықәгыларақәа рзы лкостиумқәа лассы-лассы лхала иалылхуеит. Уи ишылыԥхьаӡо ала, артист лыхәаԥшцәа рҿаԥхьа зегь реиҳа илыԥшааху, инареиӷьу лышәҵаны  дцәырҵлароуп. Хьыбла Гьерзмааԥха   еиӷьалшьоит  зӡара ҳаракны иӡаху аконцерттә ҵкқәа.  Уи еснагь аус лыцыруеит лкостиумқәеи, лыхцәыҟаҵареи, лмакиажи аус рыдызуло астилистцәа ркоманда.

Аҭаацәа аредакциазура

Хь.Гьерзмааԥҳа лԥазаҵә –  Алеқсандр (Сандро) Ӷәырџьуа (диит 1999 шықәса хәажәкыра мзазы.  Данмаҷыз ашәа иҳәон Станиславскии Немирович-Данченкои рыхьӡ зху Москватәи амузыкатә театр ахәыҷтәы хор аҿы.

Лашьа еиҵбы Лоренцо ҩыџьа ахәыҷқәа драбуп. Далгеит Москватәи Жәларбжьаратәи аизыҟазаашьақәа ринститути Сорбоннатәи ауниверситети, иԥшәма ԥҳәыс францыз ҭыԥҳауп, дпианинорҳәаҩуп. Дынхоит Франциеи Аԥсни.

Хьыбла Гьерзмааԥҳа шьҭрала Дәрыԥштәуп. Ара иҟоуп лабацәа рыҩны. Ара анышә иамадоуп лани лаби. Дәрыԥшь рџьынџь ҩны аҿы  ес-ԥхынра еизоит Хьыбла Гьерзмааԥҳа лҭаацәара ду.

Аҩызцәа аредакциазура

Акыршықәса Хьыбла Гьерзмааԥҳаи Фазиль Искандери аиҩызара бзиа рыбжьан. Уи ироман «Чегемтәи Сандро» - Хьыбла зегь реиҳа бзиа илбо шәҟәуп. Хь.Гьерзмааԥҳа асценаҿы аус лыцызуа лколлегацәеи лареи еснагь аиҩызара рыбжьоуп ( Владимир Спиваков), ҳаҭыр рықәылҵон, аиҩызарагьы рыбжьан зыԥсҭазаара иалҵыз лколлега  еиҳабацәеи лареи (Зураб Сотқилава, Елена Обрацова, Галина Вишневскаиа, Свиатослав Белза).

Ԥицундатәи афестиваль техникатә диреқторс, иара убас  спонсорс даман ашәаҳәаҩ қалақьк илыцалҵыз лҩыза, аилахәыра «ФОНД ЮГ» адиреқтор хада Андреи Дудко; лконцерттә усзура аиҿкаараҿы ацхыраара ду лырҭоит амеценатцәа, анаплакҩы Рашид Сардарови  Аԥснытәи аҳәынҭқарратә  наплакы «Аԥснытәи аҩқәеи аӡқәеи» адиреқтор хада, аҩыҟаҵаҩ Николаи Ачба. Лҩызцәеи, амеценатцәеи, лколлегацәеи лыцырхырааны Хьыбла Гьерзмааԥҳа есышықәса Аԥсны агәыҳалалратә акциақәа мҩаԥылгоит - ԥарала дацхраауеит Аԥснытәи акамертә оркестр, А.Чычба ихьӡ зху Аҟәатәи амузыкатә ҵараиурҭа, Аҟәатәи алицеи-аинтернат, амузеиқәа, иара убас ацхыраара рылҭоит абаҩхатәра злоу анагӡаҩцәа қәыԥшцәа.

Ахьӡқәеи апремиақәеи аредакциазура

  • 1993 — Аконкурс «Voci Verdiani» (аИталия), 3-тәи апремиа;
  • 1994 — Франсиско Виниас ихьӡ зху есышықәсатәи ашәаҳәаҩцәа  рконкурс  (Барселона), 2-тәи  апремиа;
  • 1994 — ихьӡ зху Жәларбжьаратәи ашәаҳәаҩцәа рконкурс (Санкт-Петербург), 2-тәи апремиа;
  • 1994 — П.И.Чаиковски  ихьӡ зху Х Жәларбжьаратәи аконкурс (Москва), гран-при;
  • 2001 — Атеатртә  премиа «Золотой Орфей» «Иреиӷьу ашәаҳәаҩ» аноминациаҿы;
  • Урыстәылатәи Афедерациа зҽаԥсазтәыз артист  (3 июня 2006 ш; рашәара 3) — аҟазара аганахьала лылшарақәа рзы;
  • 2006 —   Ареспублика Аԥсны жәлар рартист
  • 2010 —  Амилаҭтә театртә премиа «Золотая Маска»  «Иреиӷьу аԥҳәыс лроль» аноминациаҿы;
  • 2010 — Апремиа «Casta Diva»  «Иреиӷьу аоператә шәаҳәаҩы» аноминациаҿы;
  • 2010 — апремиа «Триумф»
  • 2012 — Урыстәылатәи Афедерациа жәлар рартист  (2012 шықәса жьырныҳәа 9) — аҟазара аганахьала лылшамҭа дуқәа рзы;
  • 2015 — Орден «Ахьӡ-аԥша аорден» I аҩаӡара (2015 шықәса жьырныҳәа 6 рзы, Аԥсны)  — акультуреи аҟазареи рганахьала, жәларбжьаратәи азхаҵара зауз алшара дуқәа раарԥшразы;
  • 2021 — Урыстәылатәи Афедерациа Аҳәынҭқарратә премиа алитературеи аҟазареи рганахьала 2020 шықәсазы (2021 шықәса рашәара 9 рзы ) —  Аџьынџьтәылеи адунеитәи аоператә ҟазара аизҳара ус аҿы ллагала ду азы.

Азхьарԥшқәа аредакциазура

Ахыҵхырҭа – https://ab.wikipedia.org/w/index.php?title=Герзмаа,_Хьыбла_Леуарса-иԥҳа&oldid=137954